रोटरी क्लब ऑफ अंबाजोगाई सिटीचा ‘End Polio Now Champion Club’ म्हणून गौरव; PolioPlus Fund साठी $1500+ चे भरीव योगदान
अंबाजोगाई | प्रतिनिधी
‘End Polio Now – Together We Make History!’ अर्थात पोलिओमुक्त जगाच्या संकल्पनेला बळ देण्यासाठी अंबाजोगाईने महत्त्वपूर्ण योगदान दिले आहे. रोटरी क्लब ऑफ अंबाजोगाई सिटी आणि विविध इंटरॅक्ट क्लब यांच्या संयुक्त सहकार्यातून पोलिओ निर्मूलनाच्या जागतिक अभियानाला $1500 पेक्षा अधिक भरीव आर्थिक योगदान देण्यात आले आहे. या उल्लेखनीय कार्यामुळे रोटरी डिस्ट्रिक्ट 3132 मध्ये यावर्षीचा पहिला ‘End Polio Now Champion Club’ हा बहुमान रोटरी क्लब ऑफ अंबाजोगाई सिटीला प्राप्त झाला असून, ही संपूर्ण अंबाजोगाईसाठी अभिमानाची बाब ठरली आहे.
जगभरातून पोलिओचे समूळ उच्चाटन करण्यासाठी रोटरी इंटरनॅशनलच्या वतीने ‘End Polio Now’ हे जागतिक अभियान राबविण्यात येत आहे. या अभियानांतर्गत पोलिओमुक्त जगाचे स्वप्न साकार करण्यासाठी आर्थिक योगदान आणि जनजागृतीच्या माध्यमातून विविध स्तरांवर प्रयत्न केले जात आहेत.
या अभियानाला बळ देण्यासाठी रोटरी क्लब ऑफ अंबाजोगाई सिटीने पुढाकार घेतला. यामध्ये इंटरॅक्ट क्लब ऑफ स्वामी विवेकानंद बाल विद्यामंदिर, गुरुदेव विद्यालय मोरेवाडी, वेणुताई चव्हाण गर्ल्स हायस्कूल अंबाजोगाई आणि एमआयटी न्यू इंग्लिश स्कूल यांच्या सहकार्याने PolioPlus Fund साठी $1500 पेक्षा अधिक योगदान देण्यात आले.
अंबाजोगाईच्या सामाजिक कार्याचा गौरव
पोलिओमुक्त जगाच्या निर्मितीसाठी दिलेले हे योगदान केवळ आर्थिक मदत नसून, मानवतेच्या सेवेसाठी आणि बालकांच्या निरोगी भविष्याच्या निर्मितीसाठी उचललेले महत्त्वपूर्ण पाऊल आहे. शैक्षणिक संस्थांमधील विद्यार्थ्यांना सामाजिक कार्याची प्रेरणा देत जागतिक आरोग्य अभियानात सहभागी करून घेण्याचा हा उपक्रम विशेष कौतुकास्पद आहे.
रोटरी क्लब ऑफ अंबाजोगाई सिटी आणि सहकार्य करणाऱ्या सर्व इंटरॅक्ट क्लबच्या या कार्यामुळे अंबाजोगाईचे नाव रोटरी डिस्ट्रिक्ट 3132 मध्ये गौरवाने अधोरेखित झाले आहे.
‘END POLIO NOW – WE ARE THIS CLOSE!’
पोलिओमुक्त जगाचे स्वप्न साकार करण्यासाठी प्रत्येकाचे योगदान महत्त्वाचे आहे. अंबाजोगाईच्या या भरीव योगदानामुळे जागतिक पोलिओ निर्मूलन अभियानाला निश्चितच नवी ऊर्जा मिळणार आहे.






